ORANJESTAD – Mundo ta bou di presion. E prijs di petroleo ta keda aumenta y tur isla den Caribe ta sinti e consecuencianan. Sinembargo, ta den e momentonan aki cu liderazgo ta wordo poni bou di luz. E pregunta no ta si prijsnan lo subi, pasobra nos tur sa cu nan lo subi; e pregunta real ta kico esunnan den liderazgo ta bay haci pa mitiga e impacto ey.
Diferencia den Liderazgo: Proteccion completo vs Alivio na mita
Ora nos analisa kico ta pasando rond di nos den Caribe, nos ta mira un diferencia grandi den liderazgo. Mientras e presion internacional ta aumenta, otro islanan a scoge pa pone e bienestar di nan ciudadanonan como prioridad.
- Anguilla: Gobierno a tuma e decision pa absorbe e aumento completamente. E pueblo no ta bay paga p’e subida. Den e caso aki, e famianan ta wordo proteha pa un 100%, y no djis cu un 50%.
- Korsou: A scoge pa no aumenta e prijs di gas pa cushina, Esaki ta totalmente contrario cu loke ta pasando aki na Aruba, unda cu Minister Wever di Finansa si a aumenta esaki, poniendo un peso financiero extra riba presupuesto di cada famia y hogar.
- Sint Maarten: Nan ta preparando activamente pa baha e peso di impuesto y duna sosten social na esunnan mas vulnerabel.
Y na Aruba, bo lo puntra? Awel, aki ta “Sla di Prijs”
Den un analisis detaya riba e medidanan actual, Parlamentario Hendrik Tevreden ta señala cu e proteccion contra e aumento di prijs no ta yega na tur ciudadano di e mesun forma. Tevreden ta splica cu e yudansa aki ta crea un desigualdad bisto: mientrastanto cu e uzo di gasolin ta wordo mitiga pa un 50%, y esun di diesel pa un 40%, esunnan cu no tin un vehiculo propio ta keda totalmente exponi, cargando cu e peso completo (100%) di e aumento.
E Parlamentario ta splica cu, door cu Minister Wever a scoge pa mitiga solamente 50% di e aumento, e resto di e peso ta wordo pusha directamente riba e consumidor. E personanan cu ta depende di transporte publico pa bay busca nan pan di cada dia, no lo scapa di e Sla di Prijs aki. “Esaki ta un ‘plesiter temporal’ di dos luna, sin un bista total di kico lo pasa den e dianan cu ta sigui,” Tevreden a enfatisa; señalando cu e problema real ta e falta di un vision duradero pa e bienestar di Aruba. Cu un Gobierno sinta riba un surplus di 500 miyon florin, nos pueblo no a spera un tiki ayudo… nos a spera mucho mas.
Falta di vision y solucionnan real
Awor Minister Wever ta bisa nos cu el a mitiga prijs pa e comerciantenan tambe, comosifuera cu esey lo evita e aumentonan; e comerciantenan tambe tin cu deal cu e aumento di King Ocean, e aumento di coriente y e subida di prijs di e productonan cu nan ta importa. Kiermen nos sa caba cu e Sla di Prijs lo wordo pasa pa e consumidor.
Nos sa cu nos ta importa casi tur cos y cu nos ta depende di recursonan den exterior. Pa e motibo aki, nos tin di traha den direccion pa yega na solucionnan duradero. Palamentario Tevreden a enfatisa riba e siguiente solucionnan:
- Fondo di Emergencia: Crea un reserva pa tempo di crisis.
- Hedge pa Termino Largo: Pa garantisa stabilidad di prijs.
- Diversifica Importacion: Busca rutanan di importacion mas economico.
E solucionnan aki no ta fantasia, nan ta real si busca nan activamente,” Tevreden a subraya. El a declara cu no por keda sinta riba un ‘stoel di felpa’ cu e idea cu Hulanda semper lo saca man pa brinda ‘garnachi’. E mentalidad aki no ta e liderazgo cu nos mester si nos kier pa Aruba ta un pais mas fuerte.
Conclusion
E Parlamentario a enfatisa cu un crisis ta rekeri ayudo rapido, pero tambe un ayudo mas completo posibel: “Di un Minister cu ya tin seis aña sinta riba stoel, nos a spera cu e lo a presenta solucionnan duradero, mirando cu el a experiencia un crisis caba cu e gobierno anterior.”Tevreden a conclui cu e realidad duro aki: “Awe Gobierno ta paga 50% di e aumento di gasoline, pero mañan pueblo ta paga 100% di e consecuencianan di un Gobierno sin vision y di un liderazgo ausente.”
Dicon e miyones ta keda den caha di Gobierno, pero ta e ‘garnachi’ so ta yega pa e pueblo?
