𝗦𝘁𝗼𝗳 𝗱𝗶 𝗦𝗮𝗵𝗮𝗿𝗮 𝘆 𝘀𝘂 𝗲𝗳𝗲𝗰𝘁𝗼 𝗿𝗶𝗯𝗮 𝗯𝗼 𝘀𝗮𝗹𝘂𝗱

ORANJESTAD, Aruba – 25 di mei 2025: Departamento di Salud Publico ta alerta comunidad cu e fenomeno di naturalesa referi como “Sahara Dust” a cuminsa afecta nos region y den e siman cu ta sigui esaki lo sigui afecta nos aun mas. E fenomeno aki no ta nada nobo, eta ripiti su mes na mas cu un ocacion pa aña na momento cu e stof di Sahara ta wordo transporta atravez di aire pa nos region.

Cu yegada di e stof aki, e calidad di aire ta wordo afecta y nos por experencia aumento den kehonan relaciona cu malesanan respiratorio. Esaki debi cu e aire ta consisti di hopi mas stof cu nos ta custumbra cune. Esnan cu ta sufri di malesanan respiratorio manera astma, bronkitis, alergie of sinus por presencia aumento den nan sintomanan manera :

Nanishi cera of ta core awa
Nistermento
Wowo hincha of humedo
Dificultad pa hala rosea
Tosamento
Grawatamento di cuero, wowo y nanishi

Stof di Sahara ta ocaciona tambe cu tempo ta bira mas calor pa cual motibo ta recomenda pa durante dia bebe mas likido preferiblemente awa pa tene e curpa hidrata, tambe evita di ta pafo si no ta necesario y pone extra atencion riba baby y adulto mayor riba con esaki por afectanan.
Como Departamento di Salud Publico nos ta conseha tur persona cu ta sufri di un of otro malesa respiratorio pa percura pa tin nan medicamentonan na nan alcanse na tur momento y tuma esakinan manera dokter ta prescribi. Evita di haci actividad fisico den aire liber den e dianan benidero y si tuma nota cu e sitomanan ta empeora, tuma contacto cu bo dokter di cas pa un consulta.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]

The post 𝗦𝘁𝗼𝗳 𝗱𝗶 𝗦𝗮𝗵𝗮𝗿𝗮 𝘆 𝘀𝘂 𝗲𝗳𝗲𝗰𝘁𝗼 𝗿𝗶𝗯𝗮 𝗯𝗼 𝘀𝗮𝗹𝘂𝗱 appeared first on Aruba Native.