Hulanda
Un container cu aparentemente tabata contene cosnan di mudansa normal for di Corsou, den realidad tabata yena cu cientonan di kilo di cocaina.
E descubrimento a hiba na detencion di cuater sospechoso na Lochem, kendenan tabata descargando e carga.
E droga, un total di 365 kilo, a wordo haya caba dia 4 di april durante un control di Douane den e waf di Rotterdam. E cocaina tabata scondi memey di un carga di cosnan personal cu tabata destina pa un adres na Achterhoek. Despues di mas investigacion, polis a yega na un cas na Lochem.
Dia 22 di april a interveni eynan ora cu e container a wordo entrega y habri formalmente. Cuater persona – un muher di 29 aña y tres homber di 29, 38 y 44 aña – a wordo deteni na e sitio mes. Nan ta wordo sospecha di e importacion di e cantidad di droga.
E sospechosonan, tur naci na Corsou, a wordo presenta dia 24 di april dilanti di hues-comisario y lo keda deteni pa por lo menos dos siman mas.
E descubrimento aki no ta para riba su mes. Anteriormente a bira conoci caba cu durante e mesun accion di control den e waf di Rotterdam, a haya un total di 1400 kilo di cocaina den otro containernan di e mesun barco for di Corsou. E cantidad aki di 365 kilo ta bini acerca y ta subraya, segun servicionan di investigacion, e magnitud di e ruta di contrabando.
E investigacion ta den man di e ekipo HARC, cu ta un cooperacion entre Douane, FIOD, Zeehavenpolitie y Ministerio Publico. No ta descarta mas detencion. E droganan intercepta entretanto a wordo destrui.
