E medio di Estado Iraní: a informa cu explosionnan a wordo scucha na Teheran, capital di Iran, ainda no tin informacion di e dañonan causa of di victimanan.
Explosion lo tabata na e parti nort y pariba di e cuidad.
Na cuminsamento di anochi, Isreal a pidi e habitantenan den centro di Teheran pa nan evacua, pa motibo cu nan lo bay ataca e infrastructura militar di e regimen irani. Esaki a sosode mas o menos na e mesun momento cu Trump a anuncia e supuesto tregua.
E ehercito israelí di otro banda a informa cu Iran a lansa un ola nobo di raketnan riba Israel. Un biaha mas, a pidi habitantenan pa bai directamente busca refugio den schuilkeldernan.
Sirenanan di defensa anti aereo a wordo activa na varios parti di e pais. E anuncio aki a bin poco despues cu e ehercito un rato prome a informa cu e atake anterior a caba y cu tabata safe pa sali atrobe riba caya.
Testigonan a informa e agencia di noticia Reuters, cu explosionnan a wordo scucha na Tel Aviv y den becindario di Jerusalem.
Tres Morto na Beër Sheva despues di atake di raket irani
The Times of Israel a raporta cu den oranan di anochi, durante e atakenan, tres persona a fayece na e parti zuid di e ciudad di Beër Sheva. E tres victimanan lo a sufri heridanan grave y a fayece di e heridanan ricibi.
Israel a informa cu e raketnan a bini for di Iran. Iran ainda no a reaciona. Segun Israel, lo tabata tin sigur un cuater ola di atakenan for di Iran anochi.
