Oranjestad, 16 di mei 2025 — Un sistema educativo moderno no por existi sin un base
tecnologico firme. Minister di Educacion y Innovacion, Gerlien Croes, ta pone enfoke
riba e necesidad urgente pa infrastructura di conectividad como un pilar pa eleva e
calidad y inclusividad den enseñansa Arubano.
Minister di Educacion y Innovacion, Gerlien Croes, tabata t’ey presente, conhuntamente
cu Minister Arthur Dowers (encarga cu telecomunicacion ad interim), na SETAR N.V. pa
e anuncio oficial di un logro importante pa Aruba: tur scol di nos isla lo ser conecta awo
riba e netwerk di fibra optico (Fiber Optic), un paso cu ta sostene un sistema educativo
moderno y inclusivo.
E proyecto di conectividad escolar riba Fiber a inicia den 2022 bou di encargo di
Minister Geoffrey Wever, den su rol como Minister di Asunto Economico y
Telecomunicacion e tempo ey. Minister Croes ta resalta cu e tipo di proyecto aki
merece sosten y continuidad, precisamente paso e ta sirbi interes di nos pueblo y nos
futuro generacion.
“Conectividad ya no ta un luho, sino un necesidad educativo. Un scol cu un red
confiabel y rapido por forma su alumno pa participa den un mundo digital, competitivo y
dinamico. Danki na un pensamento colectivo di e partnership publico-priva entre
Gobierno di Aruba y SETAR N.V., ta logrando esaki,” segun Minister Croes.
Danki na un colaboracion cu SETAR, den total 83 scol awo ta conecta riba Fiber, cu
acceso na internet di velocidad halto y un prijs preferencial. E proyecto, cu un inversion
total di mas cu 1 miyon Florin, ta refleha un compromiso real pa empuha progreso
educativo y digital, desaroyo di contenido interactivo, y capacitacion continuo pa
docente. Na banda di acceso na recursonan educativo, e conexion riba Fiber lo habri e
porta pa desaroyo den digitalisacion y capacita tanto alumno como educador pa traha
cu tecnologia den un manera eficiente y sigur.
Ministerio di Educacion y Innovacion ta sigui traha pa un sistema educativo cu ta
resiliente, den un Aruba cual ningun mucha ta keda atras, caminda innovacion ta sirbi
como herment di igualdad y progreso.
