ROTTERDAM – Rijksrecherche ta investigando si e wethouder di Rotterdam, Faouzi Achbar, mes a duna ordo pa kima su cas na juli aña pasa. Ministerio Publico (OM) di Rotterdam a confirma esaki, despues cu e noticia a sali publica den e media hulandes AD. Achbar a bira formalmente un sospechoso.
E cas di Achbar, kende ta wethouder di Denk, pa un gran parti a keda kima. OM ta investigando awor, si e candela tabata intencional, manera a bini dilanti den e declaracion di e sospechoso, Rudney E., kende a indica cu dos homber, incluyendo Achbar, a aserk’é pa kima e cas pa asina haci fraude cu e seguro, segun AD.
Achbar y su esposa a exigi e compensacion pa e dañonan haci na nan cas, segun OM, no tin base, teniendo na cuenta cu tin un investigacion andando referiendo Achbar su rol.
AD a raporta, cu Achbar y su partido, Denk, ta nenga rotundamente e acusacion aki y ta bisa cu e ta absurdo. Segun nan, e ta inaceptabel, pasobra segunnan e wethouder tabata e víctima y awo a bira e sospechoso. E secion di Denk na Rotterdam a papia di un “acusacion absurdo, infundamenta y casi ridículo” den un reakshon pa AD.
E candela, a causa hopi comocion den e politica na Rotterdam aña pasá. E persona cu a kima e cas a wordo deteni na januari. Y e lo a admiti di a kima e cas, pero segun su abogado e la wordo uza pa otro personanan como “loopjongen” y no ta responsabel pa e plan di kima e cas.
Achbar, kende ta wethouder pa Denk desde 2022, ainda no a duna ningun reacion. Segun un vocero, Si Achbar en berdad a duna ordo pa kima su cas, esaki mester bin dilanti ainda. E caso ta sigui bou investigacion.
Recientemente Minister di Aruba Sra. Gerlien Croes tabata di bishita cerca Achbar, e wethouder aki ta wordo sospecha di fraude cu seguro. Durante su bishita nan lo a toca diferente temanan interesante, di deporte, tambe tocante bienestar di hobennan y a papia un poco riba enseñanza. Segun nos a compronde cu Sra, Croes a keda hopi satisfecho cu e bishita y cu nan lo sigui den contacto pa mira riba cua topiconan nan lo por tin cooperacion.
Lamentabelmente cu e bishita asina exitoso aki, tin chens cu e cooperacion y contacto no lo bay duna su fruto. Esaki pa motibo cu si e wethouder aki retira, cual ta algo masha normal y eticamente na Hulanda y na otro paisnan civiliza. Un politico den un cargo importante cu ta wordo sospecha di cualke crimen, mester tuma su retiro y warda e resultado di investigacion. Alcontrario cu na nos isla e sospechoso por keda sinta den puestonan importante, na Europa y otro paisnan nan ta tuma honor na nan mes y retira.
